【有盈退休】曾智華:快樂地欣賞人事物

名人薈萃 08:35 2021/09/18

分享:

過去兩年,身邊人十之七八愁眉苦面,悶悶不樂,恍似個個有塊大石壓在心頭。

不用解釋原因,大家心照!

我有沒有這種感覺?當然有。但既然生活仍要日日過,浸在沉鬱中,絕對影響免疫系統,容易被百病入侵?

你話我識諗又好,阿Q又好,天生性格正能量也好。總之,就是不會被負力量壓倒!

方法簡單,自己告訴自己,人生有幾十條路可行。封咗一、兩條,還有幾十條!為何日日夜夜為一兩條路行不通而愁眉苦面?

一如寫專欄,小弟寫了幾十年,由甚麼都能寫開始,到1997年後,明顯漸變。開頭別人只暗示你就一就,避免太敏感的人物及題材。到近兩年,不提你都知,有些「路」,已封了水泥石屎,不再通了。你硬行等於「撼頭埋牆」,有冇咁傻?

人生路可多姿多彩

況且,你想行都沒人給你行,以免累街坊。有沒有大問題?其他人不知,我就沒有。

因為,我看見的人生路,又多選擇又極多風采。寫專欄,不寫A B?沒問題,仍有C到Z可寫。

一如我喜歡歎美食,一間心愛餐館因加租、東主移民又或者決定退休關門,當然可惜。但會否日夜狂呻?當然不會。反之,立時飛身繼續尋找,看看有沒有驚喜?

小弟信念,只要誠心欣賞有心有火有熱誠的飲食業經營者及廚師,一定口福不淺。

上周又有發現!

饒宗頤館成浪漫餐館

文化人,一定知道美孚新邨對面山有一間饒宗頤館。因不「就腳」,所以歷年幾個經營者都無法長期立足。就如此,留機會給其他人。

年半前,有位法國菜發燒友Terence Fung,正正膽生毛,在社會動盪加疫情開始時「低價入市」。結果,就憑所在地的文化氣息加餐館的浪漫氣氛,慢慢成為斯文情侶及年青中產聚集處。此餐廳名字深得我心,叫「House of Joy」!

推介你拖愛人來品嚐法國泥蟹湯及西班牙燒乳豬,真係正!

撰文 : 曾智華

欄名 : 有盈退休

緊貼財經時事新聞分析,讚好hket Facebook 專版