【有盈退休】曾智華:打疫苗嗎?我打!

名人薈萃 14:04 2021/01/24

分享:

香港人,在任何聚會,好興問人嘢(八卦?),例如:一、你移唔移去英國呀?二、你有冇買騰訊呀?三、你會否轉用signal及MeWe呀?

最近,又有N人問我:「碌Sir,你會否打疫苗呀?」

小弟答:「會!」

通常,此答案一出,對方必睩大雙眼,擺出個表情:「喂,唔係啊fa?你都肯/敢打?」

有此一問,當然因為知道小弟對政府施政極多不滿。所以,誤會我乃「反政府份子」,凡政府推的政策皆唔支持。

多餘!我素來評論時事,以理性角度出發。係好就好,係唔好就唔好。況且,如今已退休,更加毋須簽下「忠於乜乜物物」。

疫苗為唯一希望

疫情發展到今天,你知我知全世界知,病毒根本不會自動消失。若人人「佛系」式面對,一定攬死全球經濟,將過去人類的建設,逐一摧毁。試問,有任何正常人會想見到及接受嗎?

如今,唯一希望,是各大藥廠鬥快研發出預防疫苗,抵抗病藥,令大家可以逐漸恢復正常生活。

民意調查顯示,香港超過一半市民冇準備打疫苗。原因?又係你知我知大家知。第一,以拒絕打疫苗來顯示對政府的態度(有點不理性);第二,基於少少自私,要保護自己,幾大睇其他人打後有冇不良反應才決定。

任何新研發藥物及疫苗,一定要經真人臨床測試。所以,測試期,一定要有志願者。

呢批志願者,非常可敬,因佢哋用自己的身體及健康來引證新藥及疫苗效應。

過程中,少不免會出現這樣那樣的問題。點解佢哋肯接受?

無他,若任何可能具副作用而必須人體測試的藥物,皆冇人肯挺身試的話,最終就是攬住一齊「死」,無法開展第一步。

小弟決定打疫苗,沒有甚麼「崇高理念」。只是覺得第一階段志願者已測試過。我只不過在可計算風險下參與將其推廣。冇事的話,望人人皆接受,早日令社會回復正常矣。有事,天意!

講完!如果你唔肯打住,我打先囉!

 

【《iMoney》最具國際視野的投資理財創富頻道 -- 融滙國際最好、最新的投資理財智慧及方法,讓讀者盡快踏上「財務自由」之路】

# 國際視野 精明理財 盡在iMoney全新網站【 imoneymag.com

# 如欲查看更多iMoney全新網上專欄的內容請【https://bit.ly/2zJY7DJ

# 即Like iMoney智富雜誌 專頁【設定為 搶先看/See First】搶盡投資先機

撰文 : 曾智華

欄名 : 有盈退休

緊貼財經時事新聞分析,讚好hket Facebook 專版