【King談樓市】King Sir:「柏傲莊」抽得過?

名人薈萃 18:42 2020/10/23

分享:

今個星期樓市最Hit嘅話題相信必定係大圍新盤「柏傲莊」抽唔抽得過?

發展商首天開放示範單位,排隊人龍差不多成千人,高峰期仲要等成8個鐘,好似買樓唔使錢咁,認真誇張!作為投資者嘅我,買新樓不嬲都唔會去睇示範單位,而我只會睇係邊個發展商同開咩價,不過今次有好友邀請由發展商帶路行「特別通道」,唔使排隊就去趁趁熱鬧,了解下點解啲買家對柏傲莊咁瘋狂。

一入內,夾道滿布花花草草,加上重重機關,感覺猶如置身於迪士尼的迷離莊園。再行前點看看示範單位,發覺內裏沒有金雕玉砌的設計,卻只有三個交樓標準的清水房,選材及設計方面不似一般新盤的雲石、雲石都係雲石嘅豪氣,換來的卻是帶點歐陸簡約風味的設計,相信年輕中產尤其留過學的會比較喜歡。

好多人問我哩個盤好唔好、抽唔抽得過?其實個盤嘅優勢唔使我多講,兩鐵(東鐵綫及屯馬綫)滙聚,未來唔使轉車可直達港島區,加埋樓盤基座有個比觀塘apm大近10%嘅商場,生活配套非常完善。但其實個盤好唔好最緊要係睇發展商開咩價,開萬五蚊一定好,開兩萬五蚊就唔係咁好,最終首張價單折實平均呎價18,921元,入場費最低628.9萬元。

而仔細去睇首張價單,發覺呎數越細呎價越貴,例如第2座最低層8樓E室一房322平方呎,減完20%折扣後,入場價628.9萬元,呎價19,533元,而高層39樓E室,呎價為22,236元。兩房483平方呎最低入場價852.4萬元,呎價17,648元,40樓呎價為20,190元。而三房663平方呎最低入場價為1,180萬元,呎價16,713元,39樓呎價為19,505元。同一層數,一房同三房呎價相差成14至16%,而第一期二及三座的一二三房比例為30、30、40。

再比較同區兩個大型屋苑名城及溱岸8號,有10年樓齡主打3至4房大戶型、提供4,264個單位嘅名城,平均呎價做緊16,000元,而一站之隔的溱8,樓齡8年,主打2至3房提供981個單位,平均呎價18,500元。比較完後,你會發覺柏傲莊首張價單開價真係唔算貴。

至於應該買一房兩房定三房,那就睇你買層樓嚟做乜,如果自住的話,Budget鬆動就梗係買三房啦,如果首期冇咁多,可以考慮買533平方呎兩房,樓價1,000萬元以下有交易,可以做到八成按保,200萬元首期就夠。但如果係投資的話,買一房就比較好,你話又要新樓、又要大型屋苑、重要配套完善的話,區內供應真係唔多,名城同溱8嘅供應直頭係「零」添。

不過筆者對新盤嘅命名,暫時都唔係太習慣,雖然話整個樓盤構思像一個農莊,但中國人對乜莊物莊感覺始終唔係咁接受,又或者係筆者比較老餅跟唔到潮流掛,哈哈!

 

【《iMoney》最具國際視野的投資理財創富頻道 -- 融滙國際最好、最新的投資理財智慧及方法,讓讀者盡快踏上「財務自由」之路】

 

# 國際視野 精明理財 盡在iMoney全新網站【 imoneymag.com

# 如欲查看更多iMoney全新網上專欄的內容請【https://bit.ly/2zJY7DJ

# 即Like iMoney智富雜誌 專頁【設定為 搶先看/See First】搶盡投資先機

撰文 : King Sir

欄名 : King談樓市

緊貼財經時事新聞分析,讚好hket Facebook 專版