【有盈退休】曾智華:退休——戒掉炫耀性消費

名人薈萃 11:11 2020/10/18

分享:

退休後,一定要調教某些心態,例如,減少愛威,戒掉炫耀,步入平淡安寧。

昨晚,退休紀律部隊高層「大隻卜」約聚,年幾無見,霸氣驟減,英氣也失,成個典型街坊大叔款,退休對昔日威風八面的阿Sir,真大影響。

一坐低就呻:「碌sir,谷鬼氣,最近想甩手架賓士改買Tesla,十幾年車啫,竟無人肯收!」

背景故事,紀律部隊有種文化,個個愛威。所以,不少死慳死底博命月供,也要買架賓士或寶馬,泊在部門停車場晒,以向同袍表示——我好掂!

大隻卜唔例外,十幾年前用百多萬買咗架賓士,雖供到死下死下,但覺好不威風。

做官,當然到時候叮一聲就要退休,收入驟減,繼續養架賓士,你估負擔輕乎?尤其十年車之後,仿似個「老翁」,周身唔妥,餐餐入廠換零件都萬萬聲才可甩身。

老舊賓士冇人要

終於,投降,向相熟車房師傅講:「唔該同我搵人收啦,十零廿萬算嘞!」

點知,師傅無厘表情謂:「卜sir,十幾年賓士,無人要㗎,以免執條襪帶累身家呀!」

點搞?百幾萬買架車,再花大量金錢維修保養入油牌費保險,只「威」咗幾年(退休後鬼睬你!),咪話唔傷,結果劏車收場。

「我想買返架Tesla,都係一百幾十萬,新款又型又威,你點睇?」

「阿卜,老友忠告,你如今只揸住幾百萬搣過世,咪再亂花錢喇。一切炫耀性商品,放棄啦。首先,Tesla強調新科技,故不停研發新一代電池,令其續航能力倍數增加。再者,電子晶片效能越高,成本越低。若你如今花巨額金錢買部Tesla,三年後必定Out爆,五年後連二手都可能無人要,到時新車電池強,晶片靚,最重要,價錢更平!」

小弟忠告,代步,買架本田或豐田咪算囉,安全,慳油,二手有價。係呀,無得「威」,無得炫耀。但呢種虛榮,退休後仲有乜意義呢?

 

 

 

【《iMoney》最具國際視野的投資理財創富頻道 -- 融滙國際最好、最新的投資理財智慧及方法,讓讀者盡快踏上「財務自由」之路】

 

# 國際視野 精明理財 盡在iMoney全新網站【 imoneymag.com 】

# 如欲查看更多iMoney全新網上專欄的內容請【https://bit.ly/2zJY7DJ】

# 即Like iMoney智富雜誌 專頁【設定為 搶先看/See First】搶盡投資先機

撰文 : 曾智華

欄名 : 有盈退休

緊貼財經時事新聞分析,讚好hket Facebook 專版