【King談樓市】King Sir:買樓一定會賺

名人薈萃 10:11 2020/10/10

分享:

早前,筆者在香港電台《e綫金融網•King Sir會客室》訪問城市大學特約教授曾淵滄博士,訪問中談及中美角力、美大選後的新形勢、以及未來樓市走勢,而筆者每次在節目完結前都會問嘉賓,對世界亂局的今天,樓價仍然高企的情況下,無殼蝸牛此刻應否上車?大多的嘉賓都是說上車要量力而為,但曾博士卻說:「未買樓的年輕人趕快去買!」

他認為買樓是一種投資,投資一定要買一些供應有限的資產如股、樓等,能生產出來的東西如衣履鞋襪,隨着科技越先進,生產成本將越平,價格是脹不起來的。但樓就不同,因土地資源有限,除非建築技術大幅提升,未來能輕易地興建300、500層樓高的摩天大廈,那就可以解決土地有限等問題,否則樓價未來都會上升。

此外,他認為今天本地投資者再買樓要俾15%,海外人士俾30%,難得政府擋曬啲投資者,讓路俾上車客,點解唔買!加上去年政府推出「林鄭Plan」,800萬以下可以承做九成按揭,買層600萬嘅兩房單位都只係要60萬首期,兩公婆儲60萬其實唔難,年輕人應好好利用此政策,可以買就即刻買,因為到時政策變了,首期要五成、七成的話,你就買唔到!

講到呢度,筆者立即追問:「上車客其實最驚就係,唔買就升,一買就跌,如今年買下年就大跌,那怎麼辦呢?」

他從容回答說:「而家係買樓唔係炒樓,炒樓係今日買入嚟,過幾年就賣出去,但住係講緊十幾二十年嘅事,樓市升跌關你咩事?」他認為只是一種心態,買入後不要再睇自己層樓升定跌,正如買滙豐,買入後劈埋一邊唔好理,雖然而家跌到28蚊,但咁多年收嘅息都賺返曬,就算滙豐由高位跌咗咁多,但早年好平買入,現在都仲升了好幾倍。

筆者覺得曾博士說得很有道理,收租(或慳番唔使交租)即等於收股息,過多十幾廿年收嘅租(或慳番嘅租)其實已可以賺咗層樓,當你而家買入層樓,就算二三十年後樓價大跌,但跌完個價都好可能比你今天買入價都仲有幾倍升幅!


 

 

【《iMoney》最具國際視野的投資理財創富頻道 -- 融滙國際最好、最新的投資理財智慧及方法,讓讀者盡快踏上「財務自由」之路】

 

# 國際視野 精明理財 盡在iMoney全新網站【 imoneymag.com

# 如欲查看更多iMoney全新網上專欄的內容請【https://bit.ly/2zJY7DJ

# 即Like iMoney智富雜誌 專頁【設定為 搶先看/See First】搶盡投資先機

撰文 : King Sir

欄名 : King談樓市

緊貼財經時事新聞分析,讚好hket Facebook 專版