【有盈退休】曾智華:腳趾操,把劇煲

名人薈萃 16:41 2020/10/04

分享:

人,就是一部機器。要保養,要抹油,要不停運行,才會操作正常。

不過,原來好多人並冇保養自己這副「機器」習慣,直至出事,才急急補救。

最多我輩人犯,為童年時懶刷牙,但日日不停食糖。於是,一隻又一隻牙被蛀,痛到飛起,揾牙醫逐隻鑽洗再補。慘情,口腔劇痛外,父母荷包也如是,怎不「大刑侍候」(當年體罰乃正常而非反常!)。從此,日日刷牙囉。

舊同學飯聚,哎吔吔,「肥B」右手打咗石膏,「温文K」則拐下拐下來到。乜事呢?

肥B:「上星期六行街,唔覺意踢着馬路邊,成個人向前仆。本能雙手一叉,右手腕『卜碌』一聲,同入心肺,斷骨,唯有直奔急症室囉。」

温文K:「呢輪唔知搞乜,腳板越來越痛。最慘朝早落床,第一步落地嗰下,腳板痛到飛起,要行幾分鐘才慢慢適應。但行耐咗,又痛。醫生話此乃足底筋膜炎!」

見佢兩個慘樣,都知幾痛苦。無法,佢倆正是好日唔保養「機器」人辦,從不運動,到六十開外才出事,算好彩嘞。

上年紀跌親或筋膜炎,真苦過Dee Dee。其實,可以避免的。例如「肥B」,除行路應一眼關七小心外,最重要日日拉筋,增加全身筋骨柔軟度,若再多點運動。一旦出事就能夠做反應較快,損傷力減。

至於「温文K」的足底筋膜炎,起因正是足部腳掌骨之間的肌肉反應差,關節活動能力協調不足造成。其實,若早點開始日日做「腳底小肌肉訓練」,就可避免搞到筋膜炎。

我點知?因最近發覺有個非常有趣,專攻五十歲以上中年的網頁,名「港式50後」,內容極豐富,衣食住行貼士有齊外,最令我得益,為不少健康小智慧。最近,有個名關SIR的專家就教咗個「腳趾操」去防止足底筋膜炎。

小弟如今煲Netflix劇時,就會坐在按摩椅做廿分鐘「腳趾操」。兩星期後,明顯腳板肌肉增強咗,正!推薦大家到「港式50後」睇睇點樣操,祝大家部「機器」fit 到漏油!

【《iMoney》最具國際視野的投資理財創富頻道 -- 融滙國際最好、最新的投資理財智慧及方法,讓讀者盡快踏上「財務自由」之路】

 

# 國際視野 精明理財 盡在iMoney全新網站【 imoneymag.com

# 如欲查看更多iMoney全新網上專欄的內容請【https://bit.ly/2zJY7DJ

# 立即訂閱掌握投資創富資訊【 https://imoney.hket.com/im/subscription

# 即Like iMoney智富雜誌 專頁【設定為 搶先看/See First】搶盡投資先機

撰文 : 曾智華

欄名 : 有盈退休

緊貼財經時事新聞分析,讚好hket Facebook 專版