【港股分析】雲業務股份比併 業績決定一切?

股樓投資 12:52 2020/09/05

分享:

科技股周五(4日)受美股急挫及納指調整所拖累,恒生科技指數一度跌超過5%,其後逐步回穩。不少投資者現時均希望趁調整吸納新經濟類股份,但除左幾隻重磅股外,其餘不少股份都屬行業競爭對手,大家確實要識得揀。

金蝶國際(00268)和金山軟件(03888)兩間公司,以往都有辦公室軟件業務,幾年前就齊齊打入雲市場,大力投發資金到雲業務,最近幾個季度漸見成果,今年股價走勢亦遠遠拋離大市,金山首8個月累升1倍,金蝶就更誇張,同期升幅超過1.5倍。

兩隻股份早前雙雙公布中期業績,金蝶上半年由盈轉虧,錄得逾2.2億元虧蝕,而且為左推動客戶上雲,企業管理軟件業務收入按年跌37%,就算雲業務收入有所驅動,首六個月收入同比仍錄得6.6%跌幅,瑞銀甚至發表報告,指對公司雲業務盈利能力有所憂慮,股價績後自然被資金拋棄。


投資者一早就知雲業務仲有排燒錢,對業績未抱太大期望,衰就衰在金山軟件中期業績轉虧為盈,錄得逾91.6億元人民幣利潤,就算扣除接近91億元人民幣,分拆金山雲的上市收益,都仲有幾千萬實質利潤,雖然這筆純利主要受惠於遊戲業務增長,但起碼給予市場信息,就係公司仍在雙線發展。

在雲業務燒錢同時,亦可在遊戲業務賺錢獲取回報,加上分拆金山雲後有充裕資金,表面因素似乎稍勝金蝶。難怪股價在績後企得硬淨,若見回落至40元附近,不妨小注吸納坐順風車,目標價與大行摩通一樣,睇50元。

 

記者:葉志偉

緊貼財經時事新聞分析,讚好hket Facebook 專版