【百萬Blogger】財叔：成功秘訣不認輸

早前觀看信興集團CEO蒙德揚先生的電視專訪，令我想起27年前曾經同佢「同台演出」。當年蒙生未正式加入信興，來公司周年晚會客串。當時信興剛推出第一部卡拉OK影碟機，搞了個歌唱比賽，我們不約而同揀了「哥哥」張國榮的《當年情》參賽，如果我早知佢揀這首，我就揀《側面》啦，同太子爺撞歌邊有運行㗎！哈哈！

沒試過不要認輸

回想當年，他爸爸蒙民偉教了我好多嘢。雖然好多人都知蒙生引入電飯煲時，會帶住飯煲去剪髮，順道煲臘味飯給人試，但有幾多人會親身去感受呢？你可能會話以前就得，依家無可能。又或者會話：「咁重點拎住四圍去呀？就算我肯拎，依家年代唔同，我都無可能好似佢咁成功啦！」不過可能我當年較單純（或者蠢），亦可能係我第一份做Sales的工作，聽完老闆咁講，我就日日拎住廚櫃樣辦四圍去給發展商同則樓睇，等他們睇吓樂聲牌廚櫃的質素。之後賣熱水爐亦一樣當公事包拎出街，可能好「戇居」，但真係會成功喎！唔試就連成功機會都沒有，養成了我未試過，點都唔會認輸的性格，真係多謝蒙生！

最印象深刻是當年泛海集團在堅道有個新盤「海雅閣」，示範單位選用了Goldstar冷氣機，但當我知道他們未決定大樓選用甚麼牌子冷氣機，得到公司支持及當時泛海集團營業經理、現在的執行董事關堡林先生給機會，我就將示範單位冷氣機轉用樂聲牌。安裝完畢後我到場視察，剛巧又遇到關生，閒聊期間有參觀者在我們身旁說：「呢度用料唔錯喎，係用樂聲牌冷氣！」當時我跟關生相視而笑，我知道今次應該談得成這宗生意了。

分配資產最重要

訪問中蒙生提到佢常勉勵同事「Good enough is not good enough」，要不斷追求突破，千祈不可以以為自己做得好好就停下來。好多記者鍾意報道我有幾多個物業，讀者又好喜歡用物業數量來判斷一個人成功與否。其實真係幾好笑，例如我有11個單位，你覺得成功嗎？而我朋友只得兩個單位，是否代表不成功呢？可能我那11個單位市值只是約3,000萬元，而我朋友兩個單位市值是5,000萬元，究竟哪個較成功呢？大家諗法可更深入，不要只看表面！

最後蒙生分享跑馬拉松，如何在全馬43公里中分配體力，如果分配得不好，最後5至10公里會好難捱，亦寓意於理財。如果你有100元，一開始你就用了75元，你以後生活都好難捱，真係金科玉律。所以不要給自己藉口話獎勵、唔好刻薄自己、花得起有咩所謂，一早用了75元，之後的路你會好難捱。投資同理財在日常生活中都可以得到啟發，只係你有無留意同靈活運用。其實投資不用學，好似一田前CEO莊偉忠話齋，最緊要係學做人。

本文原刊於2016年6月18日第452期《iMoney Focus》。