【小老闆生意經@iM網欄】做代購好容易? 開網店為時下新趨勢

名人薈萃 07:01 2020/07/01

分享:

今時今日,個個手機不離手,加上疫情下減少出外,造就到網購的盛行。對顧客而言,網購的好處在於是24小時運作,足不出戶都可以隨時隨地買到自己心頭好。對商家而言,經營網店可以在不用任何舖租人工成本下,靈活地為自己增加被動的收入。

近年全球掀起一股代購熱潮,代購網店愈開愈多,代購產品亦愈來愈廣泛,上至名牌奢侈品,下至生活百貨,甚至零食都可提供代購服務。代購呢個行業,聽落去好似好「爽」,拖住個篋四圍行就有錢收。而且只要有客源,上班時間根本不受限制,即是鐘意幾點開工都得。代購可以一邊幫客人Shopping,一邊自己去埋旅遊,表面上看絕對是一份荀工,但其實箇中辛酸,只有做過代購的人先至會體驗到。

猶記得幾年前,自己第一次做韓國連線代購,成程旅遊就是不斷幫人入貨、搵貨、Quote價,買完又要不段點貨、Check貨、Mark價。大家覺得買貨真的很容易嗎?有時為了賺多一蚊得一蚊,拎住幾公斤重的貨,都要堅持行多幾條街去格價。而搬貨寄貨又很容易嗎?點樣將一件易打爛的貨,完整無缺放入行李箱之餘,還要好好利用成個行李箱內的位置,在不超重的情況下放最多貨。如果真的超重,又要將批貨打包好到郵局寄,自己一個女仔托行李累到半死,大家真的以為好嘆好享受?下次有機會再在本欄同大家分享做代購的辛酸史。

當初筆者因為喜歡去旅行,又喜歡儲公仔,誤打誤撞下加入了代購行業。3年前在無成本下開設代購網店,經過一年多的時間,成功賺了本金開設實體店。雖然開實體店比網店承受的風險較多,但是線上線下結合的銷售模式是零售行業發展的大趨勢。一間零售企業,經營網上平台好重要,但不代表實體店會被網店完全取代。積極經營線上的同時,線下都要配合,才可以給顧客一個好的消費體驗。而這世界好多消費者仍然有「試過、摸過、睇完實物,先肯比錢買」的心態。

不少人會問,網上代購平台眾多,究竟點先可以突圍而出?當然,市場上代購玩具精品又豈只我一個?但是,正正因為自己本身都鐘意儲公仔,會比一般代購更加了解粉絲有咩喜好。所以作為小商家,要賣一些自己本身都鍾意的東西是好重要,只有自己鐘意的東西,才會對其產品市場更熟悉,自己亦可以代入買家的角度,知道咩叫流行,咩係唔流行。下期同大家分享,在小本經營唔落廣告的情況下,Instagram出Post可以吸引更多人Like及Follow的小技巧。

作者_Anna簡介

前iM記者,現投身金融行業。白天上班8小時,跟一般白領無異,工餘時間則經營網店,從事玩具精品代購生意。愛好旅遊,本身做代購是希望幫補旅費,沒想到誤打誤撞下賺上一桶金並當上小老闆,在寸金尺土的香港開設實體門店。
iG:lineshop_hkig

更多小老闆生意經@Anna的文章請按此
如欲查看更多iMoney網上專欄的內容請按此
即睇iMoney全新網站【 imoneymag.com
#立即訂閱掌握投資創富資訊【 https://imoney.hket.com/im/subscription 】
#即Like iMoney智富雜誌 專頁【設定為 搶先看/See First】搶盡投資先機!

撰文 : Anna、編輯:邊婕

欄名 : 小老闆生意經

緊貼財經時事新聞分析,讚好hket Facebook 專版