【有盈退休】曾智華:廿一日減肥挑戰法

名人薈萃 10:29 2020/06/27

分享:

限聚令解除後,飯局不斷,大班退休同事,前晚聚首,好不快樂。眼前出現「N佬」,咦, Fit左(不是瘦咗! )咁多嘅?昔日肚腩無咗,目光炯炯。哈!點解呢?

「N佬,你同去年差咁鬼遠嘅?通常,退休人士突然暴瘦,必定唔慌好嘢,一係生癌,一係糖尿病。喂,你都係瘦,擺明唔見最少10磅,但明顯紮實又精神,攪過乜呢?」

「無呀,得閒無事上網,見到有個名為「廿一日的挑戰」( 21 Day Challenge ),唔使上堂,唔使俾錢,聲明有毅力跟足廿一日,保證可瘦15磅,且列出大量成功例子!」N佬由心笑出︰「哈!反正退咗休,一於試吓囉。無秘密㗎,等我話你知啦!」

呢個計劃,講穿,其實要你有紀律地節食, 廿一日內必須做到︰(一)戒糖; (二)戒汽水; (三)戒朱古力; (四)戒雪糕; (五)戒曲奇餅; ( 六)戒炸薯條; (七)戒「垃圾食物」(Junk Food) ; (八)少鈉(鹽、雞粉、豉油及蠔油等) ; (九)減碳水化合物(飯、麵、奶類及麵包等); (十)每日最少燃燒一千個卡路里熱量。

以上「十誡」,擺明針對鬼仔鬼妹為主,當然,中國人也適合。

N佬話,開始時,都幾辛苦,因佢為食,但又唔想俾老婆睇死,男人大丈夫,頂咪頂。除依足戒口指示,每日更最少做30分鐘帶氧運動。

神奇地,捱足7日之後,果然輕咗3磅,兼且,整個人比前明顯精神。於是,下決心,再頂7日。14日後,發現,原來,一切本來不情不願的事,成功做了兩周,即出現一種慣性,開始,全盤接受,且愈來愈「自動波」,不用提醒自己戒這樣戒那樣。做運動,更因能夠分泌安多芬,感覺快樂,當然天天做。

堅持到21日, N佬全面成功。

筆者回家上網睇睇,發覺有行為學家進一步指出,任何事,原來當一個人可「捱」過21日,就會全面適應,不以為苦。包括面對疫情、坐監、失去手腳、口有假牙⋯⋯。

#即睇iMoney全新網站【 imoneymag.com

#立即訂閱掌握投資創富資訊【 imoney.hket.com/im/subscription

#即Like iMoney智富雜誌 專頁【設定為 搶先看/See First】搶盡投資先機!

撰文 : 曾智華

欄名 : 有盈退休

緊貼財經時事新聞分析,讚好hket Facebook 專版