【趣話財經】綠地高層派綠帽?

股樓投資 16:21 2020/05/18

分享:

昨日內地財經圈引爆了一單新聞,一位名為史睿生的男士係微博實名舉報內地大型開發商、世界500強公司之一嘅綠地集團(滬:600606)高管陳軍,同自己妻子張雨婷有不正當嘅關係,而且涉及挪用公款等問題。

史睿生哭訴自己從2016年同張雨婷拍拖後,就靠自己工作供女方讀碩士,而且女方多次肥佬,要由自己俾錢重讀同搵槍手,張雨婷每到假期一定要坐商務客位去旅行,又買好多名貴手袋同首飾。

最後史睿生同張雨婷係2018年結婚,女方1年後係2019年12月進入綠地實習,成為陳軍嘅秘書,陳軍利用綠地集團每個月20萬蚊活動經費,幫張雨婷買左兩個各值1萬蚊嘅手袋,而且即使未正式碩士畢業,張雨婷都成為公司正式員工,當中自然有不當嘅男女關係。根據史睿生所言,陳軍同張雨婷講自己無生育能力,所以唔需要做任何安全措施。最後史係5月發現太太懷孕,但自己唔係爸爸。

睇到陳軍的名字,筆者相當熟悉,差啲以為綠城香港 (00337) 主席,上網一查,原來係綠地控股執行總裁?綠地已急急發表澄清,表示涉事嘅陳軍係京津冀事業部營銷部負責人,此陳軍非彼陳軍,又話會按內部規定調查。

根據內地傳媒報導,涉嫌派綠帽嘅陳軍,雖然係成個集團只算中層人員,但係綠地當年係大東北銷售達到200億元的「關鍵先生」,亦難怪可以挪用公款溝女。

戴綠帽無論男女都難忍,但唔少男人都唔肯公開,史睿生今次大爆料,原來因為張雨婷同史睿生交代時,根本毫無悔意或歉疚,話自己同男方結婚只係「備選方案」,隨時會為有錢人拋棄佢。唔通作為公司中層嘅陳軍都好有米?史睿生上載兩人對話嘅錄音,張雨婷同佢講陳軍有9000萬身家,仲會分佢3000萬。

筆者非常佩服史睿生,即使係發現左事件之後,係微博仍然維持「很愛老婆」,而係兩人對話錄音嘅時候,平靜到好似局外人咁,結果令女方將所有野講晒出黎,自己一舉反擊「狗男女」。至於涉事嘅陳軍,應該係老江湖「呃蝦條」,一方面以佢既職位正常唔會有9,000萬身家,另一方面亦唔似會肯分3,000萬俾呢位張女士,連之前溝女用嘅錢都係公司錢。

商業世界其實好危險,恃著自己有姿色,其實又傻又貪,引火上身絕對唔奇怪。

 

 

 

撰文 : 謝克迪, CFA

緊貼財經時事新聞分析,讚好hket Facebook 專版