【丘質故事】「豬」事不順 蒙牛係代言人殺手?

股樓投資 14:33 2020/04/30

分享:

就算少睇娛樂版,都知台灣明星「小豬」羅志祥近期一身蟻,估唔到呢隻豬仔嘅威力,可以延伸到股票市場。蒙牛乳業(02319)早前搵左佢做旗下品牌純甄嘅代言人,點知上周三(22日)推出代言廣告,宣傳呢位「亞洲舞王」,翌日(23日)就爆出醜聞,搞到要急急抽起宣傳,換上另一位代言人趙麗穎的廣告。最慘係拖累埋股價,周三(29日)受事件不斷發酵,單日跌近3.7%。

跌咁多都係因為大批內地網民喺微博呼籲抵制羅志祥,仲要罷買其代言產品,當然包括埋蒙牛啦!睇落蒙牛好似好慘,但原來蒙牛以往同旗下代言人八字好似唔多夾。

2018年俄羅斯世界盃,蒙牛成為全球官方贊助商,仲請埋美斯擔任代言人,點知頭兩場分組賽美斯一球都入唔到,有網民歸究係蒙牛發功,更恥笑「飲蒙牛,無入球」,到第三場比賽入波後,蒙牛隨即出帖為自己平反,點知美斯所屬的阿根廷國家隊真係緣盡十六強,令呢位阿根廷球星在國際賽繼續成為無冕帝皇。

除左羅志祥之外,蒙牛早前亦簽下內地歌手肖戰為代言人,其粉絲又唔生性,舉報同人小說中傷肖戰,引起網絡輿論,更發起杯葛其代言的蒙牛真果粒產品,大家上網打「227事件」,就會了解到係咩事,事情到而家仲未平息。

點知一波未平,一波又起,肖戰之後又來一個羅志祥,蒙牛本身希望藉其主持嘅綜藝節目,帶動產業銷售,點知偷雞唔到蝕渣米,甚至有人發起「棄蒙牛,飲伊利」,分分鐘益埋競爭對手伊利集團。

p.s. 有人話成龍係代言品牌殺手,唔知如果佢代言蒙牛,係邊個出事先呢?

p.s.2 唔講唔知,原來本港藝人陳偉霆都係蒙牛代言人,但如果小豬叫亞洲舞王,咁「的士陳」又應該點稱呼?

 

#即睇iMoney全新網站【imoneymag.com

#立即訂閱掌握投資創富資訊【imoney.hket.com/im/subscription

#即Like iMoney 智富雜誌 專頁【設定為 搶先看/See First】搶盡投資先機!

 

撰文 : 丘梓健

緊貼財經時事新聞分析,讚好hket Facebook 專版