【有盈退休】做馬主Vs做生意

名人薈萃 11:40 2020/04/04

分享:

香港人,尤其男性,不少都追求幾個夢。包括:擁有靚老婆(女友)、揸靚車、掌大權、住豪宅、發大達及做馬主。因為人總有虛榮感。尤其男人,多愛認叻,愛被羨慕,擁有以上各項,威威也。

呢呢,每年一度,發馬主夢者,又有機會夢想成真喇。因為2020年馬匹進口許可證「抽籤」又開始喇。為乜筆者要將抽籤二字加引號?無他,因幾十年從來未見過馬會在公眾面前(會員面前也無!)透明化地真真正正抽籤囉。就此,當然有權懷疑佢係咪「抽」啦。

不過心照啦,馬匹擁有權點可能公平公正咁抽吖。若如此,好大劑㗎!因為:一、若馬匹擁有權落在「不應擁有者」(品德差劣)手上就弊;二、真正有實力購入全球最高質素者抽籤食白果。

以上兩項,馬會皆不可能接受。故此,騎騎,唔好意思,繼續在大家睇唔到情況下「抽籤」囉。

做馬主,一如做生意。10個有9個,未做之前,皆充滿希望,並摩拳擦掌諗住如何「迎接成功」,呼朋引類拉頭馬,在親友面前威爆。

此外,亦一定會幻想分分鐘買到一隻「金鎗六十」馬王級佳駟,以「蔗渣」價錢,嘗盡「燒鵝」味道。因為,「金鎗六十」由練馬師呂健威引入及訓練。老呂並非大摩、蔡約翰、告東尼及高伯新一類富貴練馬師,旗下馬主可以出手分分鐘幾百到過千萬也。

「金鎗六十」出11場贏咗10場,4歲啫,獎金已超過3,000萬元。你話係咪所有馬主追尋的夢?不過,現實上,可惜你買幾千隻馬都撞唔到一匹「金鎗六十」呢。

反之,用上幾百萬至上千萬,買咗隻跑到一塌糊塗,未上陣或未贏過已退役的則大把,機會率遠遠高過撞到隻佳駟。一如做生意,做馬主,蝕本機會起碼八成。因為馬價之外,更個個月要俾4萬至6萬元養馬費及醫療費。結論,無足夠金錢實力,咪亂發馬主夢。就算發,都要知道,夢想成真後,Downside有幾大!

想掌握投資先機:即Like iMoney 智富雜誌 專頁【設定為 搶先看/See First】搶盡投資先機!

撰文 : 曾智華

欄名 : 有盈退休

緊貼財經時事新聞分析,讚好hket Facebook 專版