職場無朋友?做朋友6個心淡Moment

商業 12:35 2016/10/13

分享:

人愈大,要在社會上搵到真正朋友,愈難。但何謂「真正朋友」?首先,朋友分很多level:有「hi-bye」的、有半熟的,當然也有深交的。但當自己視對方為真心朋友,而佢又中咗以下其中一項,都咪話唔心淡︰

1. 有事鍾無艷

「喂!不如你陪我去blah blah blah」、「你買xxx係咪有折㗎?」朋友失戀搵你、買衫搵你、試新餐廳都搵你。你或者會以為自己被高度重視,但當你發現對方Facebook上的自拍、打卡一個都無你份,不禁令人懷疑對方有事先搵你。

真正朋友︰事無大小都會願意和你分享,大家有give亦有take。

2. 日呻夜呻

有心事搵朋友傾訴好正常,但如果每次見面、講電話都怨婦上身,就會令人感到厭煩。最初或會因為出於同情,而希望安慰及開解對方;但久而久之,對方的負能量不但無消失,更有機會搞到自己勁灰。

真正朋友︰有不快時會跟你「些牙」,同時亦會聆聽並接納你的意見。

3. 咩都要同你爭

總有人比較自我中心,但如果程度高到一個點:大概係次次出街都要靚過你,見到你碟意粉好似好好食,於是又叫你讓畀佢等等。其最終目的只不過是搵你做花瓶,做佢陪襯。

真正朋友︰不會樣樣計到足,而且只會將最好的留給你。

4. 嫌棄你

朋友間講下笑好平常,但如果每次都攞返出嚟講,舊事重提,難免畀人記仇的感覺。另外,如果自己做錯事,對方記你一世,仲要不斷挖苦,嫌三嫌四,應該每次出街都好似受苦咁。

真正朋友︰會諒解你,仲會同你檢討出錯位,希望大家可以一同成長。

5. 你有事佢即潛水

患難不一定見真情,當你心情低落,想搵個人傾訴時,對方總會諸多推搪或只以幾句敷衍了事。莫講話約出街見面,連講句嘢都難。

真正朋友︰喺你未出事前,已經會主動關心你。真係出事時,一定會奮不顧身幫你手,並且隨傳隨到。

6.  搵你攝時間

好聽一點就是「突然想搵你」、「有嘢想同你講」,但如果每次都是因為等人有幾分鐘空檔先打畀你攝時間,此時此刻個心肯定唔好受,尤其是聽到「唔講住喇!佢到咗」一句。

真正朋友︰重視朋友就唔會「用完即棄」,仲會體諒對方「得唔得閒」、「忙唔忙」等,在約會時間上作出讓步。

【其他熱話】辦公室大災難 講老細壞話send錯Group

【其他熱話】Send錯email 變關公? 秒速收回Email大法!

【其他熱話】打工小薯每日人生只剩下2小時

全文刊於 CTgoodjobs 

更多職場、筍工行情,即上CTgoodjobs

緊貼財經時事新聞分析,讚好hket Facebook 專版