假期後回魂7大法

一年容易又中秋，話咁快就放三日假，方便大家瘋狂食月餅，但留意返，食滯咗都係要返工㗎。唔想呆呆滯滯畀老細照肺兼OT，可以參考以下回魂大法。

1. 星期三或四返港

長假期好多打工仔會選擇去旅行，如非必要，唔好一到香港第二日即刻返工，因為精神一定差，十足walking dead咁，效率低不特止，分分鐘搞到自己病埋，攞苦黎辛。如果時間許可，不妨揀星期三或四返港，咁你捱多一兩日就有weekend回回氣，應該可以幫你回魂。

2. 返工前做好準備

返到香港第二日唔返工，唔代表無嘢做，全日喺屋企瞓覺。你應該花20分鐘，釐清嚟緊一星期要完成嘅項目，等你返到工作崗位時易啲上手，無咁崩潰。其實每逢星期日都可以咁做，包你事半功倍踢走Monday blue。

3. 早起冥想

返嚟之後嗰朝，不妨比平日早半個至一個鐘起身，沉澱思緒，確立當日或嗰個禮拜嘅目標，有助你儘快回歸日常生活同工作規律。

4. 控制飲食

放假通常一係食好西，一係食垃圾食物，高油鹽糖嘅餐單對身體有害無益，除咗積聚脂肪，仲會令人精神變差。想回復狀態同效率，可以買高纖、天然嘅食材，親自下廚，記得落少啲油鹽糖呀！

5. 花少少時間catch up

終於返到office，開工前同你合作開／相熟嘅同事傾個偈，用5分鐘了解吓你唔喺公司期間發生過咩事、跟開嘅Project進度如何等等。

6. 倒序睇email

放完假返嚟，inbox必定被轟炸，N封email等住你，點算？可以用last in first out嘅方法，由日期最近嗰封開始睇（唔好跟收到嘅先後次序）。你會發現，好多問題喺你返公司前已經解決咗，無須再跟進。

7. 專注大Project

至少安排一個大Project喺你返嚟之後進行。點解？因為與其hea吓hea吓頹住做，不如開行turbo。大Project會逼使你更快投入工作，亦會令你更有動力，呢種衝勁仲可以一直維持落去！

【其他熱話】起薪2.8萬至4.9萬　政府AO、EO招聘展開

【其他熱話】實測！「綠置居」景泰苑嘈音超標

全文刊於 CTgoodjobs

更多職場、筍工行情，即上CTgoodjobs