榴槤放題創業的故事 蝕錢為賺名氣
▲ KK在荃灣設實體店，除了賣榴槤果肉外，亦有榴槤咖啡、榴槤拉茶、貓山王Gelato雪條及榴槤蓉等產品出售。(相片來源：iMoney智富雜誌)
「水果之王」榴槤，識得欣賞的人，覺得它芳香撲鼻，味道回甘，不喜歡的人單是聞到已非常難受，敬而遠之。這種水果並非人人鍾意，上月卻有商家創新推出榴槤放題，以390元任食榴槤作招徠，吸引不少愛「槤」者瘋狂搶飛，兩日6場逾300人的放題全爆滿，坐無虛席。
今期《iMoney智富雜誌》專訪這位推出榴槤放題的「始作者」，榴槤BB創辦人袁家駒（KK），如何跟馬來西亞政府合作搞了這場獨家放題。細問之下，原來KK並非榴槤瘋狂粉絲，
我都食榴槤，不過我鍾意睇人食，多過自己食。
上月底，KK破格搞過兩日共5場的榴槤放題，容納300多人，在一個半鐘內任食5種馬來西亞的榴槤，吸引不少榴槤Fans的注意。KK眼見不少榴槤Fans都買不到票入場食，打算「食住呢鋪榴槤熱」，在9月再搞多兩日榴槤放題，更大膽在7月榴槤放題開始前幾日就售票，起初銷情卻未如理想。
可能大家怕中伏，所以抱觀望的態度，想睇下其他人食完放題的反應先再買。
【延伸閱讀】榴槤品種有學問 真假「貓山皇」點分？
與大馬政府一石二鳥
在第一日的放題完結之後，KK發現有不少回頭客，食完放題當晚回購買9月的門票，到第二日放題完結後，門票更幾乎被搶購一空。
原定賣900張飛，心諗今次應該乜都夠，點知仲賣凸。
KK只好加宵夜場次，滿足一眾榴槤Fans的心願。
雖然榴槤BB和馬來西亞聯邦農業促銷局（FAMA）合作，部分榴槤由馬來西亞政府贊助，但馬來西亞榴槤較泰國榴槤貴3至5倍，單是貓山王在榴槤BB賣500蚊個，惟榴槤放題只收每位390元，計及物流、人工，KK坦言，
搞榴槤放題都預咗蝕。
最後埋單計數，榴槤BB都蝕了五位數字。
榴槤放題生意雖然蝕本，但榴槤BB贏得不少藝人捧場，亦有不少食客「食過番尋味」。創新的榴槤放題亦吸引大批香港媒體報道，賺盡名氣。KK表示，
可以幫馬來西亞政府推廣榴槤，又可以幫榴槤BB做好Brand building（建立品牌形象），已經好值得。
【延伸閱讀】生果食肥人 荔枝 VS 榴槤卡路里最高？
獨特副製品利潤較高
榴槤BB早在一年前成立，起初以網店起家，引入不少新鮮和馬來西亞特有的榴槤，又和馬來西亞當地果農合作，設果園種貓山王，確保貨源穩定。去年在冬日美食節參展，憑貓山王的果肉Gelato雪條打響名堂，榴槤雪條更一度賣到斷市。
今年2月，榴槤BB開始在不同店舖寄賣產品，直到今年4月才在荃灣開實體店。KK表示，
開了實體店後，客人對我們的信心大咗，網上定單和實體店的生意都有增長。
現時榴槤BB共提供7種商品，包括榴槤果肉、榴槤蓉、榴槤咖啡和拉茶等。KK指出，其實出售原個榴槤的利潤低，
出面大超市可能賣1,000蚊個，但我們只是賣500蚊，賺極有限，反而是榴槤製品利潤較高。
故將推出更多獨特和創新的榴槤食品去取勝，
遲啲可能會推出非急凍產品，例如朱古力、榴槤乾等。
榴槤BB的市場策略好簡單，除了搞好Facebook之外，一切只是圍繞兩個字，「信任」。KK認為，榴槤產品單價高，客人花錢購買，已經是對自己的一份信任。故此，當客人購買後發現榴槤的質素未如理想，KK會二話不說，換一個新的，
如果客人仲係覺得質素唔夠好，我會退錢。
每次出新產品，KK都會送給藝人試食，爭取更多的曝光率，亦希望得藝人信任。
有藝人試食完覺得好食，會再同我訂榴槤送俾朋友食。他們有啲會自動Post上社交網站，啱傾的甚至會成為朋友。
預每人食6個
在7月底放題，KK預算每人食6個，準備1,800個共2.8噸的榴槤俾大家盡情食，到底點樣計算客人的食量呢？原來，KK用最原始的方法去計數，
我係Facebook上見到有個身形都幾大隻的Fans留言，話自己最多食5個榴槤，咁我預多個，一人食6個，最後就準備1,800個俾大家食。
榴槤盛宴過後，難免有少量的榴槤未食晒，KK更即場發售清貨尾。
我以為大家係個場道已經食飽，點知都有客人想買返去俾屋企人食。
亦有買不到票的榴槤Fans，專程走到會場購買。
全文刊於《iMoney智富雜誌》第461期（收費閲讀），標題經TOPick 編輯修改，原題為「榴槤放題 蝕錢賺名氣」
《iMoney智富雜誌》facebook
【其他熱話】夏日消暑瓜果比拼 4種人忌食西瓜
【其他熱話】牛油果多「好脂肪」 點揀熟牛油果？
撰文 : iMoney智富雜誌
