HR熊:請不要再盯著我電腦熒幕看

商業 13:03 2016/05/16

分享:

相片來源:iStock

無論係屋企又好,公司又好,長時間盯著人地電腦熒幕睇係幾「賊仔」行為,亦令用家周身唔自然。隻滑鼠移去咩位置,開咩檔案,打信時睇邊份template,點樣改黎改去個draft E貓俾老闆,所有行動係表現咗當時我個腦諗緊咩。係工作嘅地方,邊有人想俾人睇通睇透,特別係爭緊上位嘅同級同事和監察住你表現既上司。

阿東,個excel你入好未?唉也,你唔好而家打啲reference letter住啦,今日收工前我要將個excel send比人地參考啲data啊!

阿東聽完連聲「哦」求其應住咩都急一餐既May姐,十分鐘後,

阿東,你係度覆緊咩E貓啊?好急架?

講完隨即係位起身行埋去,對住佢個mon指指點點,要佢邊聽住指示邊入埋個excel……呢個情況係office好常見,上司正正坐係下屬後面,話就話有個partition,但有咩用?昂一昂高個頭,前面個位係認真做緊嘢定hea緊一覽無遺。

對於係fresh grad既阿東,當然有苦難言,同我地食飯時忍唔住呻過,

係屋企如果我阿媽係咁我實出聲嘈架,好似裝我係咪做衰野咁,點知番到黎一樣。May姐可能覺得好方便啦,anytime捉我有無偷懶,真係好唔舒服囉……信我唔過咁。

係被監視嘅侷促工作環境下,工作上又無自主嘅自由,唔好話做到累想偷偷地開個細視窗上陣網睇下嘢,就算正正經上網查字典或者查下最update嘅勞工法例,感覺到有對眼係後面,都會無故壓力倍增。

我地呢班出左年打拼左三幾年既人其實好明白,已經無需要時刻俾人睇到我係「努力中」,只要最後製成品出左世老闆滿意就得架啦。

面對住心急易燥底嘅老闆,有時硬係要企定定蹺埋雙手係你隔離睇住你即時edit,唯有叫自己冷靜啲唔好露出面紅緊張嘅表情。

通常我地會搬出大大小小既理由耍開老闆,「忙緊另一單urgent野啊,轉頭搞店即刻send比你過目啦!」,「趕住出個offer比人,個candidate今晚飛啦」,「過一過account個邊拎番張cheque先」,轉過頭佢有佢忙就唔記得你住。人始終唔係機械,會怕羞會尷尬嘛。

不如嘗試相信下屬有獨立處事既能力,俾左指示,set個deadline,只要有疑問肯諗方法搵答案咁大家都多左時間空間專心做嘢。

不過一眾老油條係唔會照顧你咁多情感問題,佢地嘅經典語錄係︰做咩都係「為左你好」, 電腦係公家嘅,我係你老闆,唔通無資格望你係電腦做咩?你唔可以光明正人俾人睇等於「身有屎」,更加要多啲check住你,我係要睇啊你……可以點?教你係塞錢落你袋咋,仲唔快啲謝恩?

老油條自己呢?行埋佢個位少少立即崩緊,電話收埋,縮細晒啲file鬼鬼祟祟,驚死你係佢身上攞到料咁。

阿東話齋︰「再盯實我電腦睇,我就一次過開幾十個file出黎,樣樣show一半,起勢打字,睇你望得邊樣,捉唔到我路!我無玩野啊,咪multi-task緊囉!」

文章刊於作者HR熊 - 職場航行日誌 Facebook個人網頁,TOPick 獲授權轉載。

撰文 : HR熊 - 職場航行日誌

緊貼財經時事新聞分析,讚好hket Facebook 專版