HR熊:上班族媽媽

商業 17:23 2016/04/21

分享:

相片來源:iStock

聽到有關醫院懷孕30周嘅外科護士喺當夜更時腦中風需要深切治療嘅新聞時,再一次佩服香港上班族媽媽,為阿B,為份糧,為前途,幾辛苦都頂硬上!

眾所周知,護士人手短缺問題一直存在,以為好彩獲得豁免當夜更,其實不過係生完後慢慢還債。

就算話有得領取額外津貼鼓勵當夜更都好,通頂突發事通常較多,搞到工作壓力更大,係咪應該以同事身體著想為主先呢?

唔能夠單憑用錢嘗試解決問題。如果無人願意幫懷孕同事頂夜更,你係佢嘅話為免俾人非議,寧願唔顧自己辛苦做埋佢都唔想聽到同事嘅冷言冷語啦。

曾經有位同事霞姐大住個肚喺月尾lead住幾個細嘅計payroll到夜晚12點,著住人字拖鬆身衫,以最舒服嘅衣著令自己輕鬆少少,不停滴住眼藥水捱眼訓對數。

我地做細嘅見到佢不時流晒汗托住籮咁大嘅肚做野好唔忍心,經常叫佢準時收工,有咩我地盡量follow up,佢每次都笑笑口堅稱唔緊要,要陪我地一齊開turbo……

其實我地大約猜到,係上面班大粒佬俾壓力佢,喺大家面前都聽過:

霞姐,無左你點得啊?


上次我想揾個陳年file都係得你先知喺邊咋,仲有好多management report係你當年一手一腳dup出嚟,親生仔嚟架,無你mon住班友仔一定錯漏百出!

半讚半逼嘅情況下,霞姐唯有繼續留守。

到霞姐放完產假返嚟,感覺到佢開始有啲精神緊張和抑鬱,一來工作量太繁重,重新pick up要時間唔可以速戰速決,上面只認為「而家你再無藉口唔OT,否則小心你apprasial個分」,霞姐一掛住個b只可以睇下相聽下錄音,想早啲番屋企享受天倫之樂都難。

終於喺兩個月後,佢決定轉工,後來聚舊聽佢好雀躍咁講,雖然職位一樣人工加好少,不過遇上絕對信任佢工作能力嘅好老闆,只要安排好工作準時收工係等閒事,而且又有提供哺乳嘅支援設施俾媽媽同事喺上班時間泵奶,大大加強左霞姐對公司嘅歸屬感,個人開心番好多,係我地最希望見到嘅畫面。

喺小熊心目中,在職媽媽比職場女強人更有韌力同耐性,時刻要一心幾用,一邊專注工作,一邊諗定小朋友日常嘅安排,幾時飲奶、邊個負責湊同埋屋企啲奶粉濕紙巾尿片嘅存貨等等,腦用量比我地超出幾十倍!

雖然小熊未有福氣做媽媽,不過睇嚟係時候train up下自己將來要孭起咁偉大嘅職責!

文章刊於作者HR熊 - 職場航行日誌 Facebook個人網頁,TOPick 獲授權轉載。

撰文 : HR熊 - 職場航行日誌

緊貼財經時事新聞分析,讚好hket Facebook 專版